تقييم أحمر

Noura-alj كتب:السلام عليكم ورحمة الله وبركاته
كيفكم

موضوع إرتجالي مثل مايقولون ..

عنوان الموضوع مايتكلم عن التقييم اللي موجود بالمنتدى هنا بس منه بس أنا اتكلم بصوره عامه عن تقييم الشخص المقابل


زمان ايام الدراسه كنت اشوف ناس كثير ما أهضمهم أقول يالله هذي شلون متحملينها صديقاتها يا أني احسها غثيثه بشكل ماينتصور
وبعد فتره تدور الأيام ويصير بيني وبينها موقف و تصير صحبه وتطلع اطلق صديقاتي اللي عرفت ايام الدراسه
ويمكن تستمر علاقتنا حتى بعد الدراسه


صديقتي نجلاء تعرفت عليه ايام أول ثانوي قبل كان معنا بالمتوسط بس ماكنت احتك فيها كنت اشوفها دائماً بس ماصار بيني وبينها موقف ابد
ويوم دخلنا الثانوي لقيتها بنفس المدرسه المهم تعرفت عليها وصارت بيننا صحبه الى وقتنا الحالي
بعد مرور سنه من معرفتنا لبعض قالت لي تصدقين ماكنت اهضمك من ايام المتوسط لكن يوم عرفتك قمت اسب في نفسي ليه احكم على الناس قبل اعاشرهم؟
قلت عندي وعندك خير هههههههههههههه
ماعمره صار بيني وبينها احتكاك كيف ماهضمتني؟؟
طيب ليه نحكم على الشخص بدون مانجلس معه ونعرف مستوى تفكيره او حتى شخصيته الداخليه؟


كل إنسان يظهر صوره معينه عنه قدام الناس ويخفي صوره ثانيه مايعرفها الا الناس اللي حوله
يعني واحد يضحك و يفرفش طول الوقت وماعنده وقت للحزن والا الكآبه
و اذا عرفته عن قرب و جلست معه لحالكم يطلع إنسان مُتشبع من الحزن وكل الظروف اللي حوله تدعيه للحزن لكن مايحب يظهر للناس اللي يناظرونه شي يبيّن مدى حزنه


نفس الشي مع الشخص اللي نحكم عليه فقط من خلال تصرفاته من بعيد او من خلال تفكيره بكتاباته او ردوده اذا كان بمنتدى
نتوقع ان هالشخص غثيث و متكبر و مدري ايش بس اذا عرفته عن قرب تختلف نظرتك له
حالياً بديت احط قياسات للأشخاص اللي اقابلهم من اول مره او الناس اللي اشوفهم بحياتي اليوميه يعني مو كل شخص احكم عليه من اول نظره
أعطيه عذر اذا شفت منه شي موب زين و أقول زله نعديها شكل هذي مو من طباعه نشوفه مره ثانيه ونحكم عليه
قال عمر رضي الله عنه : (لا تظن بكلمة صدرت من أخيك شراً وأنت تجد لها في الخير محملاً)..

إبحث عن عذر لأخيك لو كانت كلمته تحتمل إحتمالين خير او شر ..
يعني اذا قال كلمه مُبهمه مو واضح منها انها خير او شر انت إختار انها خير و خل ربك يحاسبه ..

واحده حكمة علي إني أنسانه فاسده و أعيث في الأرض فساداً
ولابد من بتر كلتا قدمي مع اليد اليسرى وتنتيف الرموش كـ عقاب مُبسط لي لإفسادي فسيولجية الهضم لديها و إن لبن " إكتيفيا " ماعاد ينفع معها

هذي الانسانه ذكرتني في مُراهقتي ايام الثانوي يوم كنت احش بخلق الله وما أهضم احد
وبعدين يصيرون كلهم صديقيني ..






مايستفاد من الموضوع :
لاتحكم على أحد الا اذا عاشرته ..